வரும் மார்ச் 13 முதல் 22 வரை சிங்கையின் உட்லேண்ட்ஸ் மற்றும் துவாஸ் சோதனைச் சாவடிகள் வழியாக மலேசியாவுக்குச் செல்லும் பயணிகள் “மிகக் கடுமையான போக்குவரத்து நெரிசலை” எதிர்கொள்ள நேரிடும், அதனால் காத்திருக்கும் நேரம் அதிகரிக்கும் என்று குடிவரவு மற்றும் சோதனைச் சாவடிகள் ஆணையம் (ICA) இன்று மார்ச் 9 அன்று வெளியிட்ட அறிக்கையில் கூறியது. வரும் மார்ச் 21 அன்று சிங்கப்பூரில் ஹரி ராயா புவாசா கொண்டாடப்படவுள்ளது (ரமலான் மாதத்தின் இறுதியை குறிக்கும் நாள்). அதே நேரம் மார்ச் இறுதி வாரத்தில் பள்ளி விடுமுறைகளும் வருவதால் மேம்படுத்தப்பட்ட பாதுகாப்பு சோதனைகளைக் கருத்தில் கொண்டு இது செய்யப்படுகிறது. மத்திய கிழக்கில் நடந்து வந்த போர் சூழலில் சற்று தணிந்து வந்தாலும், தொடர்ச்சியாக அதிகரித்த உலகளாவிய பாதுகாப்பு பிரச்சனை காரணமாக சோதனைச் சாவடிகளில் சோதனைகளை அதிகரிப்பதாக ICA முன்னர் அறிவித்திருந்தது குறிப்பிடத்தக்கது.
“Peak crowd expected” – Singapore residents alerted; ICA releases an important advisory.
அதனால் வரும் மார்ச் 9 அன்று, குடியேற்ற அனுமதிச் சாவடிகளை (Immigration) முடிக்க பயணிகள் அதிக நேரம் காத்திருக்க வேண்டியிருக்கும் என்றும், பயணத்தைத் தொடங்குவதற்கு முன் நிலச் சோதனைச் சாவடிகளில் போக்குவரத்து நிலைமையைச் சரிபார்க்க அறிவுறுத்தப்படுவதாகவும் ICA அதிகாரசபை கூறியுள்ளது. நிலச் சோதனைச் சாவடிகளில் போக்குவரத்து புதுப்பிப்புகளை நிலப் போக்குவரத்து ஆணையத்தின் (LTA) One Motoring வலைத்தளத்திலும், ICA-ன் Facebook மற்றும் X கணக்குகளிலும் காணலாம். பிப்ரவரி 13 முதல் 19 வரையிலான சீனப் புத்தாண்டுக் காலத்தில் காரில் சோதனைச் சாவடிகளைக் கடந்தவர்கள், உச்ச நேரங்களில் குடியேற்ற அனுமதிச் சாவடிகளைக் கடந்து மூன்று மணி நேரம் வரை காத்திருந்ததாக ICA கூறியது. அந்தக் காலகட்டத்தில் நிலச் சோதனைச் சாவடிகளைக் கடந்து மூன்று மில்லியனுக்கும் அதிகமான பயணிகள் சென்றதாக அது மேலும் கூறியது.
மேலும் கடந்த பிப்ரவரி 13 அன்று பயணிகளின் எண்ணிக்கை உச்சத்தை எட்டியது என்றும், அன்றைய தினம் மட்டும் இரண்டு சோதனைச் சாவடிகள் வழியாக 5,65,000-க்கும் மேற்பட்ட பயணிகள் தங்கள் குடியேற்றத்தை முடித்து கடந்து சென்றதாக தகவல் வெளியாகியுள்ளது. சோதனைச் சாவடிக்கு வெளியே சுற்றியுள்ள சாலைகளில் கட்டுமானம் மற்றும் சாலைப் பணிகள் நடைபெற்று வருவதால், உட்லேண்ட்ஸ் சோதனைச் சாவடியை அணுகும்போது வாகன ஓட்டிகள் கவனமாக இருக்க வேண்டும் என்று ICA தெரிவித்துள்ளது.
பயணிகள் தங்கள் பாஸ்போர்ட்களைப் பயன்படுத்தாமல் குடியேற்றத்தை முடிக்க MyICA மொபைல் பயன்பாட்டிலிருந்து உருவாக்கப்பட்ட QR குறியீடுகளைப் பயன்படுத்துமாறும் அதிகாரசபை ஊக்குவித்துள்ளது. இருப்பினும், வெளிநாடுகளுக்குச் செல்லும்போது அவர்கள் தங்கள் பாஸ்போர்ட்களை அவர்களுடன் எடுத்துச் செல்ல வேண்டும் என்பது கட்டாயம்.
சக்கர நாற்காலிகளில் பயணிப்பவர்கள் மற்றும் நான்கு உறுப்பினர்கள் வரை உள்ள குடும்பக் குழுக்கள் பேருந்தில் பயணம் செய்தால், சிறப்பு உதவிப் பாதைகளில் QR குறியீடுகளைப் பயன்படுத்தி விரைவான அனுமதியைப் பெறலாம். இந்த பரபரப்பான காலகட்டத்தில் பயணிக்க வேண்டியவர்கள் நெரிசலைத் தவிர்க்க எல்லை தாண்டிய பேருந்து சேவைகளைப் பயன்படுத்துவதையும் பரிசீலிக்கலாம் என்றும் ICA தெரிவித்துள்ளது. அதே நேரம் முந்திச்செல்ல செல்ல நினைத்து வரிசையில் குறுக்கே நுழைய நினைக்கும் வாகன ஓட்டிகள், திருப்பிவிடப்பட்டு மீண்டும் அதே வரிசையில் சேர வேண்டியிருக்கும் என்று போலீசார் எச்சரித்துள்ளனர். பிப்ரவரி 13 முதல் 17 வரை சீனப் புத்தாண்டு காலத்தில் போக்குவரத்து தொடர்பான குற்றங்களைச் செய்த 59 வாகன ஓட்டிகள் பிடிபட்டதாக ICA தெரிவித்துள்ளது.
சமீபத்திய பண்டிகைக் காலத்தில் உட்லேண்ட்ஸ் சோதனைச் சாவடியில் ஆபத்தான முறையில் வாகனம் ஓட்டுதல் மற்றும் வரிசையை தாண்டி செல்லுதல் மற்றும் இரட்டை வெள்ளைக் கோடுகளைக் கடத்தல் உள்ளிட்ட பல போக்குவரத்து விதிகளை மீறியதற்காக கிட்டத்தட்ட 60 வாகன ஓட்டிகள் தண்டிக்கப்பட்டனர். பிப்ரவரி 13 முதல் 17 வரை சோதனைச் சாவடியில் அதிகரித்த அமலாக்க நடவடிக்கைகளின் போது அவர்கள் பிடிபட்டதாக காவல்துறை மற்றும் குடிவரவு மற்றும் சோதனைச் சாவடிகள் ஆணையம் (ICA) பிப்ரவரி 20 அன்று தெரிவித்தன. குறைந்தது 59 வாகன ஓட்டிகள் போக்குவரத்துக்கு எதிராக வாகனம் ஓட்டுதல், இரட்டை வெள்ளைக் கோடுகளைக் கடத்தல் மற்றும் வரிசைகளைத் தாண்டுதல் உள்ளிட்ட குற்றங்களைச் செய்ததாகக் கண்டறியப்பட்டது.
